Неле йодыш таратен

Йошкар-Оласе «Роза ветров» йоча да самырык-влак рӱдер Кугу Ачамланде сарыште Сеҥымашлан 75 ий да Марий Эллан 100 ий теммылан пӧлеклалтше «Край родной марийский» республикысе шымлыме паша конкурсым эртарен. Кужэҥер район Коҥганур школын тунемшыже Анастасия Петухова «Моя землячка – народная революционерка» шымлыме пашажым (вуйлатыше – марий йылмым да литературым туныктшыо Г.С.Тобекова) аклымашке луктын.  «Летопись родных мест» таҥасыште икымше верым сеҥен налын.

– Школнан «Чумбылат» командыже «Мунло» уш-акыл марафонышко кажне ийын ушна. Тений икымше верым сеҥен налын, – ойла Настя (снимкыште шолаште). – «Кужэҥер район Тумньымучаш села гыч кӧ калык революционерке лийын?»  йодыш тений эн нелылан шотлалтын. Ты йодышак мыйым шымлыме пашам эртараш кумылаҥден.

 

Настя пален налын:

*Кужэҥер район Тумньымучаш села гыч калык революционерке – Анна Васильевна Якимова.

*Тудо 1856 ийыште шочын.

*1867 ий гыч Вяткыште епархиальный училищыште тунемын. Школышто пашам ыштен.

*1875 ийыште А.Якимовам арестоватленыт.

*«Народная воля» революционный толкынын еҥже лийын.

*1883 ийыште Сибирьыш каторгыш колтеныт. 1904 ийыште тушеч куржын.

*Икымше руш революцийыште участвоватлен. Тудым, 1905 ийыште кучен, уэш Сибирьыш колтеныт.

*Октябрь революций деч вара Москваште илен, «Каторга и ссылка» журналым лукмаште тыршен.

*1941 ийыште Москва гыч Новосибирскыш эвакуироватлалтын.

*1942 ийыште ӱмыржӧ кӱрылтын.