Ньогалан – «изи театр»

27 март – Театрын тӱнямбал кечыже. Тиде пайремым тӱҥ шотышто театр пашаеҥ-влак пайремлат. Республикысе курчак театрыште нунылан веле огыл, йоча-шамычланат кажне спектакльже – пайрем. Тушто 1-4 ияш икшыве-шамычлан шукерте огыл бэби-театр почылтын. Теве Йошкар-Оласе 5-ше номеран «Хрусталик» йочасадыш коштшо кум ияш Ясмина Куприянова театрышке икымше гана толын. «Театр на ладошке. Весна» спектакль, артист-влак Анжела Тихонова ден Евгений Лежнинын устан модмышт ӱдырлан моткоч келшен. Спектакль деч вара эсогыл нунылан почеламутым каласкален, мотор сумкажым, модышыжым ончыктен (2-шо кӱшыл снимкыште). Тугеже бэби-театр изи икшыве-влакым шке векыже савырен кертын. Тиде «изи театрын» шкешотан сеҥымашыже.

Бэби-театр тыланда эше палыдыме, очыни. «Baby» шомакым марий йылмыш кусараш гын, ньога манме лиеш.

1-4 ияш ӱдыр-рвезе-влаклан келшыше театр нерген икымше гана колмеке, шукын ӧрыт. Ньога-шамыч спектакльым умылат, огыт лӱд мо? Нине йодышлам рашемдаш манын, мыят «Театр на ладошке. Весна» спектакльым ончаш мийышым.

™дыр-рвезе-влаклан келшыше пӧлемым «ош зал» манаш лиеш. Тушко йолчиемым кудашын пурыман але алмашташлан пелен кондыман. Кажне йочан шке верже уло, тыглай огыл – пушкыдо изи кӱпчык. Пеленышт теҥгылыште авашт шинчат. Йоча-влак, спектакльысе герой-шамычын каласымекышт, кӱлеш годым куржталыштын, нушкын, тӱрлӧ чия дене сӱретлен кертыт.

«Театр на ла-дошке. Весна» спектакль лач нунын ийготыштлан да кызытсе пагытлан келшыше. Тыште пӱртӱсын помыжалтмыже, ийсӱс ден вӱд пырчын «йоҥгалтмышт», кайык-влакын мурымышт – икманаш, шошо нерген ойлалтеш. Икшыве-шамыч изи оҥгыр, глюкофон полшымо дене нине йӱк-влакым шкештат лукташ тыршат. Артист, ача-ава-влак дене пырля шӧршудо гыч фейерверкым ыштат, тудым корзиҥгаш погат, вара тушеч вареньым шолтат. Нунын шинчаончылнышт шочшо кайыкигылан чоҥештылаш полшат. Парняшкышт изи «кайыкым шынден», шкештат шулдыраҥыт.

– Бэби-театрын тӱҥ шонымашыже йоча-влакым модыкташ веле огыл, моторлыкым ужаш, сылне семым колышташ, театрыште шкем кучаш туныкташ. Модмына годым южыжо ик верыште ынеж шинче, тыгодым «Тыйын театр верет кушто?» манын чӱчкыдын ойлена. Икмыняр жап гыч нуно тунем шуыт, палаш тӱҥалыт, – ойла театрын артисткыже Анжела Тихонова.