Вес олала ден илемла деке мыняр кужыт улмым шотлаш тӱҥалме верым «нулевой километр» маныт. Тудым шукыж годым рӱдӧ почто отделений тураште вераҥдат. Марий Элыште ты оралте Йошкар-Оласе Советский уремыште верланен. У арт-объект рӱдолан географий да административный рӱдер улмыжым ончыкта.
– «Нулевой километрым» ончыктышо пале олам сӧрастарыше эше ик арт-объектыш да турист-влакым кумылаҥден кертше верыш савырна манын ӱшанем, – палемден Марий Эл Республикым Вуйлатыше Юрий Зайцев «нулевой километрым» почмо годым.
Оля МОШКИНА.
Авторын фотожо.
