Одо кундем тора, да лишыл

– Ме, Марий Эл деч то-раште илыше-влак, шочмо марий йылмынам утларак пагалена, марий улмына дене утларак кугешнена. Тиде шижмашым йоча-влакын чонышкышт шыҥдарена, – ойла Одо кундем Карагӧл район Ныргындыш школышто директорын воспитаний паша шотышто алмаштышыже А.В.Васильева (снимкыште йоча-влак дене пырля).

Школышто марий йылме арням шукерте огыл эртареныт. 1-10-шо класслаште тунемше ӱдыр-рвезе-влак марий кундемым, шочмо йылмым палымыштым викторинылаште тергеныт. Туныктышо-шамыч марий сылнымут ден фольклорлан кугу тӱткышым ойыреныт. Мутлан, йоча-влак «36 изак-шоляк» литератур модышышко ушненыт, калык йомак-шамычын геройыштым пален налыныт. «Мыйын шочмо элем» сӱрет ончерыште могай гына пашам ужаш лийын огыл?! Йоча-влаклан марий модыш-шамыч дене модаш поснак келшен.

– Школышто кажне гаяк йочан марий тувыржо уло. Тудым тӱҥалтыш класслаште туныктышо Ирина Лаврентьевна Зылева урген. Шочмо калыкын вургемжым чиен, марий мурым муралташ, тудын почеш кушталташ чылан кумылан улыт. Чылт марий муро деч посна ме кусарыме мурымат йоҥгалтарена. Мутлан, «Антошкам», «Канде вагоным». Тыге моло калыкын мурыжымат жаплаш туныктена, – ойла Алевтина Владимировна.

Одо кундем тора гынат, моткоч лишыл. Тушто марий йылме ден сылнымутым куанен тунемыт, конкурс ден олимпиадылашке ушнат, сеҥышыш лектыт. Тидыже шочмо калыкна верч кугешнымаш кумылым шочыкта.