Книга йочан илыш корныштыжо кугу верым айла. Чынжымак, тудо чыла кертеш. Тушто кӱлешан увер аралалтеш да тукым гыч тукымыш кусна. Арамлан огыл 2 апрельыште Йоча книган тӱнямбал кечыжым палемдышна. Йоча книга арням эртарена. Тыге кушкын толшо тукымым сылнымут деке шӱмаҥдена, утларак жапым книгалан ойыраш кумылаҥдена.
Мый йочам годсек книгам погем. Йочасадыште пашам ышташ тӱҥалмеке, шкешотан книгагудым келыштаренна. Программе почеш могай произведений лийшаш, тугай книгам чумыренна. Кызыт книга-влак моткоч мотор улыт. ЙошкарОласе 80-ше номеран «Ӱжара» йочасадыш коштшо икшывевлаклан (снимкыште) нуным лаштыклаш да пырля лудаш пеш келша.
Надежда ГОДУНОВА.
Авторын фотожо.
