Байкал ер воктене ыштыме фотошто тыгай сӱретым ужаш лиеш: иктаж чоҥгаште, пу меҥгыште але пушеҥгыште тӱрлӧ тӱсан тасма лойгалт кеча. Тиде да моло арверым «бурханить» йӱлам шукташ кучылтыт. Ты кундемысе юзо вийлан шӧрым, тасмам, кампеткым але вес йӧрварым пӧлеклат. Тыгодым айдемын шонымашыже поро да яндар лийшаш, тунам веле тудо шукталтеш.
Тасма-влак тӱрлӧ улыт да тӱрлӧ семын маналтыт. Иктым меҥгыш, весым пушеҥгыш веле сакаш лиеш. Шукыж годым куд тӱрлӧ тӱсан тасмам кучылтыт, кажныже ойыртемалтше шонымашым ончыкта.
- Нарынче – поянлыкым, тулым, кечым, шокшым да лектышым.
- Йошкарге – лӱдыкшыдымылыкым, кӱдыратле койышым да вийым.
- Канде – кавам, ласкалыкым, чынлыкым, порылыкым. Тиде пӧръеҥын тӱсшылан шотлалтеш.
- Ужарге – илыш вийым, тӱзланымашым. Ӱдырамашлан келшен толеш.
- Ошо – вӱдым, чон яндарлыкым. Кеч-могай кончышлан тӱҥалтышым пуышо тӱс.
- Шем тӱс чер да ойго деч арала. Эн неле татыште веле кучылтыт.
Катя СЕРГЕЕВА.
Авторын фотожо.
