Волжск Марий Эл Республикысе ола-влак коклаште кумдык дене кокымшо верым айла. Тудо Юл эҥер серыште верланен.
Олан историйжым да тачысе кечыжым Волжск оласе А.С.Пушкин лӱмеш 9-ше номеран школышто 6-шо классым тунем пытарыше Василий Осин (снимкыште) шымлен да «Фотографий гоч Волжск олан историйже» проектым возен. Тудлан аваже, историйым туныктышо Екатерина Валерьевна Шешина, полшен.
– 1940 ий 6 июльышто Лопатино посёлкым Волжск манын лӱмденыт. Кызыт тушто 50 тӱжем утла еҥ ила. 86 ий жапыште ола кузе вашталтын? Ты йодышлан вашмутым муаш манын, тошто фото-влакым онченам да олан кызытсе тӱсшӧ дене таҥастаренам. Палемдыме шуэш, «Машиностроитель» ден «Рӱдӧ» микрорайон-влак пытартыш коло ий жапыште койынак уэмыныт, моторештыныт. Ола мучко ятыр оралтым олмыктымо, ум чоҥымо. Туге гынат илаш йӧрдымӧ але сӱмырлышӧ оралтат ситышын, – ойла самырык шымлызе.
Волжск ола 9 микрорайонлан шелалтеш: «Рӱдӧ», «Заря», «Машиностроитель», «Дружба», «ВДК», «Северный», «Горгаз», «Западный», «Мамасево». Василий кажныжым ончал савырнен, тошто фото-влакым интернетыште да книгалаште кычалын. Мумо фото снимкыжлан эҥертен, войзалтме верыш миен, уэш снимкым ыштен. Ты паша дене рвезе «Малые Евсеевские чтения» регион-влак кокласе шанче-практике конференцийыште выступатлен. Василий, шочмо кундемжым шымлен, эртыме корным аралаш да радамлаш полша.
Оля МАЙКОВА.
Фотом еш архив гыч налме.
