Моткоч ожно илен улмаш Онар. Тудо виян, пеҥгыде капкылан лийын. Юл эҥерыш пурымеке, кыдал йотке веле нӧрен, эн кӱкшӧ пушеҥге пулвуйжо марте шуын. Икана Марий кундемыште илыше керемет ден Аждага лӱман дракон Онарым пытараш мутланен келшеныт. Нуно паленыт: патырын вийже вӱдыштӧ лунчырга. Садлан тудым Юл серыш ондален колтеныт.
– Вӱдия кынелын. Чыла илышым пытарынеже, – шойыштыныт коктын.
Калык верч шогышо Онар тыманмеш Юл серыш куржын. Туштыжо молгунамсе семынак тымык: серыште кайык-влак икте-весе дене выче-выче мутланеныт, тӧрштылыныт, эҥерын ший вӱдшӧ кечыште йыли-юли йылгыжын.
Кенета Онарын тупышкыжо дракон кержалтын да патырым вӱдышкӧ шӱкал шуэн. Шӱйжым пурлын, аярым колташ шонен. Ты эҥгек нерген янлык-шамыч колын шуктеныт. Маска ден ир лудо тӱшка полшаш толыныт. Нуно тушманым пырля сеҥеныт гынат, патырын капышкыже аяр логалын. Вӱд гыч лекмеке, Онар мландыш шуҥгалтын, тудым омо темдалын. Талешкым аважат помыжалтен кертын огыл. Юзо пӱчӧ Онарлан илыше вӱдым йӱк таш темлен.
– Эргыч йыдалже гыч мландым почкен, кок курык шочын. Каналташ вочмо олмыштыжо ер лийын. Тушто вӱд юзо виян. Паремден кертеш,
– Онарын аважлан янлык каласен.
Тыгак лийын. Онар илыше вӱдлан кӧра писын тӧрланен. Кундемыште илыш ласкаҥын.
Жап гыч марий мландым уэш ойго авалтен. Вӱдия, чынжымак, помыжалтын. Марий-влакын илыме верыштым вӱд йымак колташ шонен. Онарлан шкетланже осал вий ваштареш шогаш йӧсӧ лийын. Ойго нерген пален налмеке, Китай гыч мунло дракон чоҥештен толын. Пырляште вий кок пачаш шукемын. Онар Вӱдиям пӱтырал кучен, мунло дракон парнялажым йӱлалтен. Тылеч вара Вӱдия вуйжымат ончыктен огыл. А Китай гыч толшо мунло дракон ден Онар таҥлалтыныт.
– Мый тӱрлӧ калыкын йомакшым лудаш але йӱкемдыме йӧн дене пайдаланен колышташ йӧратем. Марий легенде-влакым шымлем. «Моя волшебная история» республикысе усталык конкурс нерген пален налмеке, калыкемын талешкыже да марий чодырасе янлык ден кайык-влак нерген йомакым шонаш кумылаҥынам, – палдарыш Данила.
Оля МАЙКОВА.
Фотом еш архив гыч налме.
