«Кипяток» газет «Мый Марий Элыште илем да тидын дене кугешнем» сочинений да видеоролик конкурсым иктешлен. 2-шо номеран Кужэҥер школын тунемшыже Егор ПЕТУХОВ (снимкыште) «Марий кундем! Тый – шочмо кундемем» сочиненийже дене сеҥышыш лектын.
– Оҥай историй-влакым школышто тунеммем деч ончычак шонен лукташ тӱҥалынам. Сылнын возен мошташ манын, шуко лудам. Фэнтези жанр дене возымо книга-влак келшат. Ик эн йӧратымыже – Джоан Роулингын «Гарри Поттер» книгаже. Сочиненийым возымо мастарлык авам Любовь Валентиновна Петухова деч куснен, шонем. Тудо школышто руш йылмым да литературым туныкта», – каласкала Егор.
Рвезе сочиненийыштыже патриотизм шомак нерген шонкала. «Тиде шочмо кундем дене кыл, шочмо мланде, калык дене кугешнымаш. Эн ондак ме ача-авам, шочмо суртым, школым, йолташ-влакым йӧраташ тунемына. Вара шкенам шочмо кундемын ужашыже семын шижаш тӱҥалына», – умылтара Егор. Рвезе марий калыкын талешкыже-влакым шарналта: Акпарсым, Онарым, Пашканым… Кочаже Александр Михайлович Перминовын лӱддымылыкшӧ дене кугешна. Шочмо пӱртӱсым моктен воза.
– Гриша шольым мландышарын картшым ончаш йӧрата. Тӱрлӧ эл-влакын лӱмыштым ойла. Российын моткоч кугу улмыжым умыла. Мый тудын парняжым кучем, мемнан изи республикнам ончыктем: «Тиде Марий Эл. Ме тыште шочынна. Ме тудын дене кугешнышаш улына», – ойла Егор.
