Никита Милютин – Советский районын ик эн тале шахматистше. Тудо Вечын школын 4-ше классыштыже тунемеш. Йочасадыш коштмыж годымак шахмат дене кылым кучаш тӱҥалын. Советский посёлкысо Йоча усталык пӧртыштӧ мастарлыкшым ик ий наре вияҥда. Тренерже – Э.В.Данилов. Йошкар-Ола гыч тренер А.Б.Темнов дене Интернет полшымо дене тунемеш.
– Мый гроссмейстер лийнем. Мыланем Магнус Карлсенын модмыжо моткоч келша. Лишыл жапыште кугыеҥ-влакын шахмат дене кумшо спорт разрядыштым налнем, – ойла рвезе.
Никитан сеҥымашыже ятыр. Кызыт 5 шӧртньӧ, 7 ший, 3 той медальже-влак, кок кубокшо улыт. Ӱмаште 1, 2, 3 юниор разряд-влакын нормыштым шуктен.
