Юлия Хохлова, Варвара Канашина, Виктория Козлова, Анна Кужнурова ден Камилла Басырова (снимкыште) Медведево районысо Шуко профилян лицей интернатыште 11-ше классыш вонченыт, тунемше-влак советын еҥже улыт. Камилла – вуйлатыше, Варвара – алмаштышыже.
Чолга ӱдыр-шамыч лицейын илышыжым уэмдаш да тунемше-влаклан шинчымашым погаш оҥай лийже манын тыршат, тӱрлӧ проектым илышыш шыҥдарат. Нунын паша лектышышт – шинча ончылнак: конкурслашке ушнен, сеҥымашке шуыт. Шукерте огыл «Территория УСпеха» всероссийский конкурсын финалышкыже лектыныт. Ты таҥасымаш йоча-влакын школ илышым вуйлатен моштымыштым вияҥдаш виктаралтын. Тӱрлӧ регион гыч тунемше-шамычын эн сай советыштым ойыреныт. Конкурс икмыняр йыжыҥан лийын. Тушко ушнаш йодмашым пуымо годым ӱдыр-влак советыштын пашашт нерген видеовизиткым ямдыленыт. Кокымшо турышто шке сомылышт нерген видеоролик гоч каласкаленыт. Тӱрлӧ направлений почеш шуктымо пашаштлан акым пуэныт, тунемше-шамычын каҥашыштлан эҥертеныт да лицей илышым вуйлатыме шотышто ончыкылыклан программым ямдыленыт.
– Отборочный этапым эртыме годым тунемше-влак советыштын виян велжым пален налыныт да нелылыкым палемденыт. Тӱрлӧ мероприятийым эртарымашке йоча-влакым утларак ушеныт. Лицей илышым ойыртемалтшым да виянракым ыштыме шотышто икшыве-шамыч шкеак каҥашым пуэныт, – ойла тунемше-влак советын педагог-кураторжо, директорын воспитаний шотышто советникше Людмила Гусева.
«Свой-среди-своих» каҥаш сай лектышым ончыктен. 9-ше классыште тунемше кажне йочан 11-ше класс гыч наставникше уло. Нунын тунемме профильышт икгай: лекше йодышым рашемдаш куштылгырак. Тыге 9-ше классыште шинчымашым погышо-шамыч экзамен деч лӱдмым чарненыт, кугурак ийготан иза-ака-влак дене вашкыл пеҥгыдемын.
Лицейысе медиаций службын сомылжо оҥай. Тушко 9-11-ше класслаште тунемше-влак ушненыт. Икте-весе коклаште лекше умылыдымашым шке гыч решатлаш тунемыт.
«Атлас профессий» направлений почеш класс шагат жапыште профориентаций сынан вашлиймаш лиеш. Выпускник-шамыч шке пашашт нерген каласкалат. Тыге вашкыл пеҥгыдемеш, 9-11-ше класслаште тунемше-влаклан чын корным ойыраш йӧн пуалтеш.
Конкурсым иктешлыме почеш, Шуко профилян лицей-интернатысе тунемше-влакын советше 30 финалист радамыш лектын. Иктешлымаш Москошто «Выбираем будущее» российысе слёт радамыште эртаралтеш. Ӱдыр-влак проектыштым аралаш тӱҥалыт. Нунылан сеҥымашым тыланена.
Людмила ГРИГОРЬЕВА.
Людмила Гусеван фотожо.
