Пошкудо Татарстан кундемыште марий районысо школлаште тунемше-влак Йошкар-Олаште марий йылме да литератур дене эртаралтше регион-влак кокласе олимпиадышке кажне ийын ушнат. Тений гын, вич районысо школла гыч ӱдыр-рвезе-влак шинчымашыштым тергеныт. Актаныш район Мари-Суксу тӱҥ школын 9-ше классыштыже тунемше-влак Диана Арсланова да Кирилл Усманов (снимкыште) дене палыме лийым.
– Мемнан школышто марий йылмым шочмо йылме семын икымше гыч индешыме классла марте тунемына, – ойла Диана. – Туныктышына – Ирина Александровна Галиева. Арняште кум шагат ойыралтеш: 2 шагат йылмылан да ик шагат литературылан. Школыштат, ешыштат, йолташ-влак коклаштат марла мутланена.
Сӱрет куандарыше. Ончыкыжымат тыгак лийже ыле. «Марий йылмым, калык йӱлам аралымаште да вияҥдымаште ялысе тӱвыра пӧрт пеленысе «Ший памаш» калык фольклор ансамбльын надырже моткоч кугу, – палдара марий йылмым да литературым туныктшыо И.А.Галиева. – Ансамбльым Ирина Робинзоновна Миникаева вуйлата. Тушко изижат, кугужат, самырыкшат, шоҥгыжат коштыт. Ансамбль кум тукымым ушен шога». Йоча-шамыч, кугыеҥ-влакым ончен, Семык, Ӱярня, Шорыкйол пайрем-влакым эртарыме йӱлам, нунын ойыртемыштым пален кушкыт. Ты кундемыште ваш умылымаш, икте-весылан полышкалымаш озаланат. Тыгай койыш-шоктыш кеч-куштат сеҥымашке шуаш полша.
