Кажне йоча пийым, пырысым але вес ныл йолан йолташым моткоч йӧрата. Тудын кӱлешлыкшым ача-ава умылат гынат, икшывын йодмым эреж годым шукташ ямде огытыл. Марий Турек район Косолап селаште илыше Тюлькинмыт ешыште тыгай нелылык лийын огыл. Вате-марий Павел Сергеевич ден Елена Сергеевна Максим, Лиза да Настя икшывыштлан лу кроликым налыныт. Нуным четлыкыште огыл, посна печен налме фермыште ашнат.
– Мый фермер улам. Ушкалым, шорыкым ашнем. Йоча-влак суртвольыклан шӱман лийышт манын, кроликым налынна, – ойла Павел Сергеевич. – Нуным ончаш неле огыл. Писын кушкыт, шуко игым ыштат. Мотор, пушкыдо пунан йолташыштым йоча-влак пукшат, модыт, койышыштым эскерат. Икте шудым конда, весе ковышта дене сийла. Кажныжлан лӱмым пуаш шонат. Ныл йолан йолташым ончен, поро кумылан, шке пашалан мутым кучышо кушкыт. Адакшым кроликын шылже тазалыклан пайдале. Тидымат шотыш налынна.
Тюлькинмыт кызыт сур да ош великан урлык кроликым ашнат. Нуно кужу пунан, кугу капан лийыт. Тӱшка дене илаш йӧратат. Чотыштым ешарыме шотышто йодмемлан тыге вашештышт: «Жап рашемда, тӱҥжӧ йоча-влак куанышт».
