Сай игече, яндар юж, леве мардеж… Чылажат, класс, йолташ-влак але родо тукым дене погынен, пӱртӱс лоҥгашке, вӱд воктеке миен толаш таратат. Теве Н.А.Заболоцкий лӱмеш кокымшо номеран Шернур кыдалаш школышто 4-ше «А» классым тунем пытарыше ӱдыр-рвезе-влак (снимкыште) туныктышышт Юлия Михайловна Мухачева да ача авашт дене пырля шукерте огыл походыш миен толыныт.
Марий Элна моткоч мотор, ер да чодыралан поян. Ты сылнылыкым ужаш манын, пӱртӱс лоҥгаш каналташ лектынак коштман. А кеҥеж – тидлан эн йӧнан пагыт.
– Кажне ийын класс дене походыш коштына. Кужэҥер, Марий Турек районлаште лийынна. Тений ача-ава-влак Параньга район Сидыр почиҥга воктенысе эҥер деке миен толаш темленыт. Ончыч походна эр гыч кас марте шуйнен гын, ты гана йӱдлан кодынна. Чылалан моткоч келшен. Йоча-влак шер теммеш йӱштылыныт, колым кученыт, юарленыт, кумдыкымшымленыт, емыжым погеныт. Ача-шамыч шашлыкым, пловым да тушёнкан рожким ямдыленыт. Ӱдыр-рвезе-влак маршмеллоум тул ӱмбалне кучен жаритленыт. Кастене, тулото воктеке погынен, кугыеҥ-шамыч йоча жапыштым шарналтеныт, походыш коштмышт нерген икшывыштлан каласкаленыт. Тыгерак йӧратыме классемым визымше классыш ужатенам, – ойла Ю.М. Мухачева.
Оля МОШКИНА.
Юлия Мухачеван фотожо.
