Пӱртӱс пуымо усталыкше лыҥ

2019-2020 ийлан Марий Эл Республикын Олык Ипай лӱмеш Кугыжаныш молодёжный премийжым пуаш темлыме претендент-влакын пашаштым каҥашымаш кая. Кум номинацийышке: литератур, искусство да архитектур; науко, технике да производство; социально кўлешан да мер паша – 35 проект дене 53 претендент ушнен. Нунын коклаште – «Ончыко» журналын тӱҥ редакторжо И.Г.ПОПОВ. Игорь Геннадьевич 2018 ийыште савыкталтше «Поч омсатым» почеламут сборникше дене темлалтын.
– Еш айдемын пӱрымашыштыже кугу верым айла, маныт. Тый кузе шонет?
– Мый У Торъял районысо Човыксола ялыште шочын-кушкынам. Ачам Геннадий Андреевич – шофёр, авам Лидия Петровна – доярке. Мӧҥгыштына книга, журнал, газет эре шуко лийын да кызытат уло. Ачам ден авам мыйым да акамым туныкташак тыршеныт. Шкештат сылнымутлан шӱман улыт, лудаш пеш йӧратат – мемнамат кумылаҥденыт. Акам гын, школыш кайымекыже, мыланем, ныл-вич ияшлан, книгагудо гыч сӱретан изи книга-влакым лӱмынак нумалеш ыле. Варажымат туныктен, марий йылме да литератур дене олимпиадылан мӧҥгыштат ямдылен. Тидыже Марий кугыжаныш университетыш тунемаш пураш сай полыш лийын. Арам огыл акам ынде шкежат – «Ирина Геннадьевна»: Немда школышто англичан йылмым туныкта. Чылажат еш гыч тӱҥалеш.
– Поэзийыш икымше ошкылым кунам ыштенат?
– Почеламутым возаш Немда школышто тунеммем годым тӱҥалынам. Тӱҥалтыш классыште туныктышем Надежда Ивановна Терехова шочмо ял нерген возаш мӧҥысӧ пашам пуэн ыле. Тунамак возымемым «Ямде лий» газетыш колтеныт. Возымо паша келшен, витне, эше да эше серенам. Варажым Лидия Анатольевна Садовинан вуйлатыме юнкор кружокыш коштынам. Туныктышем-влаклан таум ойлем.
Шарнем, варажым тый чолга юнкор семын Антонов Ивук лўмеш премий дене палемдалтыч.
– «Ямде лий» газет нерген ойлаш гын, тудо кызытсе шуко (кажне гаяк) поэт-писатель-журналистлан трамплин лийын. Мыят єрдыжеш кодын омыл. Тў‰ редактор Л.В.Семенован серышыже-влак, юнкор слёт-влак, Антонов Ивук лўмеш премий, юнкор йолташ-влак – чылажат мыйым, тачысе Игорь Поповым, ненчаш полшен.