Тиде шукерте ожно лийын. Изи ял шоген. Ик вечын кугу чодыра гӱжлен, а вес могырым курык-влак верланеныт. Тиде ялыште Пӧт лӱман рвезе илен. Тудо моткоч поро кумылан, пашаче кушкын, полшаш эре ямде лийын. Пӧт пӱртӱсым пеш чот йӧратен. Тудо чодыраш чӱчкыдын коштын. Чодыра рвезылан куатым пуэн. А мланде пашам ыштыме годым рвезе утларак вияҥын. Пӧт тидым шижын.
Икана пеш шокшо кеҥеж лийын. Ялыште вӱд ситен огыл, емыжат кошкаш тӱҥалын. Ял калык полышым Юмо деч йодын. Йӱдым Пӧтлан омо конча, пуйто тудлан ала-кӧ ойла: «Тендан ялыште патыр рвезе уло, тудо полшен кертеш». Пӧт умыла: чыла тудын кидышты же. Вачышкыже котомкам сакалта да чодыра велыш ошкылеш. Шке семынже эре шонкала: «Ял калыклан кузе полшаш?» Каналташ шинчеш да ойгыж дене шортын колта. Кенета шинчавӱд мландышке камвозеш да тушеч изи памаш йыргыктен йоген лектеш. Варажым памаш эҥерыш савырна да ял мучко йоген эрта. Ял калык вӱдлан пеш чот куана! Чыла ылыжын! Калык, рвезылан тауштен, ялым Пӧт манын лӱм ден. Тыге Пӧтъял шочын, а Пӧт эҥер кызытат ял мучко йоген эрта.
Ульяна САВИНОВА.
Волжский, Пӧтъял школ пеленысе Йоча усталык пӧрт.
