«Беспилотные авиационные системы» национальный проект дене келшышын, Марий Элыште 17 школышто кружок пашам ышта. Нунын кокла гыч иктыже – Провой кундем Эсмекпляк школышто. Занятийым эртараш чыла йӧн уло. Педагог-влак Ульяновскысо авиационный колледжыште кок арняш курсышто лийыныт. Эсмекпляк школышто ешартыш шинчымашым налаш кок кабинетым ямдыленыт. Кружокыш 24 йоча коштеш. Икшыве-влак туныктышо дене пырля дроным погаш тӱҥалыт.
– Тыгай кружокын пайдаже моткоч кугу. Тушто налме шинчымаш кызытсе саманыште чыла вере кӱлешан. Пилотдымо авиацийлан специалист-шамычым ямдылымаште кугу полышым пуа, – ойла кружок вуйлатыше Сергей Витальевич Созонов.
Тунемше-влак ончыкыжым ты направлений дене илышыштым кылдынешт гын, Йошкар-Оласе технологический колледжыште «Эксплуатация беспилотных авиационных систем» специальностьым налын кертыт.
М.СКОБЕЛЕВЫН фотожо.
