Ачам эрдене кынелеш,
Вигак пашашке тарвана.
Да машинаж ден кудалеш,
Чодырам «осал» деч арала.
Кочам Шемъерыште илен,
Йырваш – чодыра, чодыра.
Кузе чот тудо йӧратен
Пӱртӱсым, нурым, тӱтырам!
Кочам ачамым эреак
Чодыра аланыш коштыктен.
«Пушеҥгым огеш лий руаш»,
– Тыге тудлан умылтарен.
А кызыт мый ачам пелен
Эре вашкем шем чодыраш,
Да ший гай ерым эскерем.
Могай мотор, аралыман!
Пырля ме колым кучена,
Ачам эн чулым, эн мастар.
Кеч-кунамат мылам полша,
Ачам – эн поро, чын йолташ.
Ачамын таче – юбилей!
Мый шокшын-шокшын саламлем.
Кузе мый тудым йӧратем,
Эн чот туддене кугешнем!
Андрей УШКОВ.
Волжский, Сотнур.
Фотом еш архив гыч налме.
