Республикысе марий тӱвыра рӱдер «Изи мӧр пеледыш» сценарий сборникым савыктен луктын. Тушко йочасадыште, школышто, тӱвыра пӧртыштӧ марий пайремым эртараш полшышо сценарий-влак пурталтыныт. Тидын нерген сборникым чумырышо Р.П.НИКОЛАЕВА каласкала:
– Тиде книгашке пытартыш ийлаште эртарыме йоча пайрем да конкурс-влаклан сценарийым пуртымо. Нуно У ийым, Йочам аралыме тӱнямбал кечым, Пеледыш пайремым, Колумб лудмашым, марий калык пайрем-влакым эртараш полшат. Ӱмаште Шарнымаш да чап идалык лийын. Книган ик ужашыже тидлан пӧлеклалтын. «Изи мӧр пеледыш» сборникым тӱрлӧ пайрем да мероприятий гыч ятыр фото сӧрастара.
