У тунемме идалык тӱҥалын. Икшыве-влак кужу каникул деч вара парт коклашке уэш шинчыныт. Кӧ гын икымше гана школ омсам почын пурен. Нунын ача-аваштын чоныштышт могай шижмаш озалана? Икшыве-влакын кумылышт могай? Тидын нерген мыланна каласкалышт.
К.В.АНТРОПОВА (Шернур район):
– Кирилл эргым 1-ше номеран Шернур школыш каен. Чонышто тургыжланымаш, лӱдмаш озаланат. У тунемме идалык деч чыла сайым гына вучем. Ача-ава-влаклан чытышым, умылымашым, пеҥгыде тазалыкым тыланем. Йоча-влак ӧрканыде, кыртмен тунемышт, сеҥымашышт дене куандарышт. Тунемме корнышт куштылго лийже.
В.Г.НИКОНОВА (Йошкар-Ола):
– Ксюша – кумшо икшывем. Школышко йочан икымше гана кайымыж годым кажне гана тургыжланем. ™дырем рӱдоласе 3-шо номеран школышто тунемаш тӱҥалеш. Икымше сентябрьым моткоч вучен. Эсогыл кажне кечым шотлен. Сайын тунемаш тӱҥалеш манын ӱшанем. Ача-ава-влаклан чытышым да пеҥгыде тазалыкым тыланем.
Т.Э.ВАСИЛЬЕВА (Морко посёлко):
– Елена ӱдырем посёлкысо 2-шо номеран школын омсажым тений икымше гана почын. 1 сентябрьым изин-кугун вучен. Пайремыште почеламутым сылнын лудын. «Мый «визытанлан» веле тунемаш тӱҥалам», – ойла. Тек тыге лиеш. Икшывылан эҥертыш лийын моштыман, кертме да йӧн лийме семын полшыман. Тунам гына тудо кӱкшытыш шуын кертеш. У тунемме ий лектышан лийже. Йоча-влак тыршен тунемышт.
