Кугу Сеҥымашлан 75 ий темме вашеш Моско воктенысе Руза ола кундемыште верланыше Петрищево ялыште «Зоя» тоштер комплексым почмо. Тудо 6 гектар кумдыкым айла. Тоштер комплекс Совет Ушемын Геройжо Зоя Космодемьянскаялан да Москва верч кредалше тӱжем дене салтаклан, калыклан пӧлеклалтын. 1941 ийыште комсомолка, партизанке 18 ияш Зоям тиде ялыште фашист-влак казнитленыт. Зоя Космодемьянская ӱдырамаш-влак кокла гыч Совет Ушем Герой почётан лӱмым икымше налын.
«Зоя» комплекс у тоштерым, Кулик колхозницын пӧртшым (тушто Зоя казнитлыме деч ончыч пытартыш йӱдым эртарен), самырык ӱдырым казнитлыме вереш шогалтыме мемориалым, Зоян ончычсо шӱгаржым (вара тудым Москосо Новодевичье шӱгарлаш тоеныт), тошто музейыште верланыше Самырык разведчикын пӧртшым уша.
У тоштерыште 8 тематический зал уло. «Курымашлык полк» Шарнымаш заллан кугу верым ойырымо. Совет Ушем Герой-влакын лӱмыштым возыман «Стена героев» стендым келыштарыме.
