Школлаште 3-шо чырыкат шеҥгелан кодо. Йошкар-Оласе 10-шо номеран школышто тунемше-влак ты жапыште технологий урокышто мом ум пален налыныт? Тидын нерген ты предметым туныктышо, педагогике науко кандидат С.И.КОРОБЕЙНИКОВ палдара:
– Йоча ужшо, кучен ончен кертше, ыштыме пашаже кумылжым нӧлтыжӧ манын, технологий урокышто проект дене пашам ыштымым эн пайдалылан шотлем. Тыгодым йоча уверым кычалаш, иктешлымашым ышташ тунемеш. Тӱҥжӧ – пашалан шӱмаҥеш. Адакшым туныктышо, тунемше да ача-ава-влак усталык пашашке иквереш ушнен кертыт. Икшыве, тӱҥалме сомылым мучаш марте шуктен, ямде арверын пайдале улмыжым шижшаш. Сандене проект пашан темылажым тыгайым ойырымо: у ий кож модыш, 23 февральлан да 8 Мартлан ача-ава-влаклан пӧлек, Сеҥымаш кечылан пӧлеклалтше паша-шамыч.
5-8-ше класслаште тунемше рвезе-влакын эн сай пашаштым иквереш чумырен, технологий классыште тоштерым келыштарыме.
С.КОРОБЕЙНИКОВЫН фотожо.
