Кишке ийым у сеҥымаш дене ужатышна да Имне идалыкым у шонымаш дене вашлийна. Йошкар-Оласе Бауман лицейыште 10-шо медиаклассыште тунемше ӱдыр-рвезе-влак «PRO ЛБ» школ газетын икымше номержым савыктен лукна (снимкыште). У пашам тӱҥалме годым чон эре тургыжлана. Тиде проектым илышыш ворандарен шукташ манын, кок тылзе тыршышна, паша кӱжгӧ лийын. Икымше номерым ямдылымашке 30 утла еҥ ушнен. Мыланна наставникна Ирина Вячеславовна Москвина чот полшен. Эре пеленна лийын, йоҥылышым жапыштыже кораҥден. Газетыш возышаш темым рашемдымаште шуко ой-каҥашым пуэн. Ме Ирина Вячеславовна дене кугешнена да таумутым ойлена. Ямде материал-влакым газет лаштыклаш вераҥдымаште «Ямде лий» газетын дизайнерже Элина Ямбаршева кугу пашам шуктен. Декабрь тӱҥалтыште газет 500 экземпляр дене савыкталтын. У ий вашеш мыланна, ача-ава, туныктышо-влаклан чапле пӧлек лийын, шонем.
Газетышке Бауман лицейын илышыж гыч эн оҥай да кӱлешан увер-влакым вераҥдыме. Уста тунемше-влак дене интервьюм лудаш лиеш. Спортсмен ден сӱретче-влак профессийым ойырен налме шотышто ой-каҥашым темлат. Моло рубрик-шамычымат келыштарыме.
«PRO ЛБ» тиде тыглай газет гына огыл. Тиде медиаклассыште тунеммашын паша лектышыже, мастарлыкым ончыктымаш, лицей илыш дене палдарымаш. Икманаш, черетан сеҥымаш! Тӱшкан ыштыме паша эре кугу лектышан!
Юлиана КУРОЧКИНА.
Авторын фотожо.
