Кочам Петр Матвеевич Янбердин Кугу Ачамланде сарыште кредалын. Тудо 1920 ийыште Буймо ялеш шочын. Шым классым тунем пытарымек, «Мариец» колхозышто пашам ыштен. 1940 ийыште мобилизоватлалтын. Ончыч Кемеровысо военно-пехотный училищыште командирлан тунемын. Сар тӱҥалмеке, кумшо Белорус фронтын составыштыже пулемёт взводын командирже лийын. Сар деч вара кочамым Забайкальеш служитлаш колтеныт. 1948 ийыште шочмо кундемышке пӧртылын. Вара Москошко куснен. Туштак ешым поген. Мотостроительный заводышто пашам ыштен.
Патырлыкым ончыктымыжлан Йошкар Шӱдыр, I да II степенян Кугу Ачамланде сар орденла дене палемдалтын. Тыгак ятыр медаль дене суапландаралтын. Мыят тудын гай патыр лийнем.
Леонид ЯНБЕРДИН.
Татарстан, Агрыз, Буймо.
