Республикысе ятыр школышто агрокласс-влак улыт. Тушто ӱдыр-рвезе-шамыч ялозанлык паша дек лишкырак лийыт. Тӱрлӧ кушкылым шындат, ончен куштат, опытым эртарат, шымлат, ялозанлык дене кылдалтше ончыкылык специальностьым налаш ямдылалтыт. Теве Марий Турек школышто 8-ше агроклассым тунем пытарыше Полина Щеголева (снимкыште) «Пеледалтше шарнымаш» проектым возен да илышыш шыҥдараш тӱҥалын.
– Капитан Н.Ф.Гастеллолан памятник – школнан кугешнымашыже. Кажне ийын тунемше-влак шарныктыш ончылан гераньым шындат. Йошкар пеледыш вӱрла коеш, да подвигын акше нерген ушештара. Тиде школын «илыше историйже». Ме, проект дене пашам ыштен, шкенам агроном-ландшафтник семын шижын кертына. Ыштышаш сомылым шке радамлена, шындена, кажне кушкыллан мутым кучена. Садлан клумбо моторлык веле огыл – тукымвлак кокласе кыл, манаш лиеш, – ойла ӱдыр.
Ӱдыр-рвезе-влак, кум тӱрлӧ гераньын укшлажым пӱчкын, февральыштак вӱдыш вожым колтыкташ вераҥденыт. Тылзе гыч мландыш шынденыт. Кудо урлыкын писынрак «помыжалтмыжым» эскереныт да дневникешышт палемденыт. Майыште гераньым шарныктыш ончык шынденыт да проектын историйже, тудын дене пашам ыштыше еҥ-влак нерген уверым, QR-кодым вераҥденыт.
– Агроклассыште тунемше-влак июнь гыч тӱҥалын сентябрь марте арня дене дежурствым эртена. Эрдене да кас велеш вӱдым шавена, кок арнялан ик гана ӱяҥдышым оптена, жапыште шӱкшудым кӱрына, тӱрлӧ шукш-копшаҥге деч аралена. Фотомат ышташ тӱҥалына. Памятник воктек тӱҥалтыш класслаште тунемше-влакым экскурсий дене ӱжаш да ты сомыллан кумылаҥдаш шонена. Проект октябрьыште мучашлалтеш. Тымарте эн сай укшым пӱчкын налман, погымо уверым, фотом, дневникым вес агрокласслан пуаш ямдылыман, проектын кӱлешлыкше нерген моло тунемше-влак деч йодыштман, районысо газетыш, школысо медиацентрыш статьям возыман, – ойла Полина.
Кажне икшыве шочмо кундемжым тӱзаташ кеч изи надырым пышта гынат, кумда элна тӱзлана. А проект пашан пайдаже тунемшылан моткоч кугу: проектым возаш, сомылым радамлаш, тӱшкаште пашам ышташ тунемеш.
Христина АЛЕКСАНДРОВА.
Фотом школ архив гыч налме.
