«Артек» тўнямбал йоча рӱдерыште «Большая перемена» всероссийский конкурсым иктешленыт. Тушко Российын тӱрлӧ регионжо гыч 5-7-ше класслаште тунемше 600 ӱдыр-рвезе ушнен. Марий Эл гыч кум тунемше таҥасен, да коктын сеҥышыш лектыныт. Тиде Йошкар-Оласе Бауман лицей гыч Мария Лежнина да Йошкар-Оласе 14-ше номеран гимназий гыч Ульяна Николаева (снимкыште).
– Ончыкылык школ нерген проектым команде дене ямдыленна: 3D макетым ыштенна, туныктымо паша дене палдаренна. Проект искусственный интеллект, робототехнике, программирований дене кылдалтын. Сетьыште лӱдыкшыдымылык урок, искусственный интеллектан орол да моло нерген возенна. Кокымшо кечын «Из интроверта в экстраверта» сообществым шонен луктынна. Тиде конкурс мыланна у шинчымашым пӧлеклен. Ятыр уста йоча дене палыме лийынна, – ойла Ульяна.
