27 сентябрь – воспитательын да йочасад пашаеҥ-шамычын кечышт.
Воспитатель – изи ӱдыр-рвезе-влаклан поро туныктышо, ӱшанле эҥертыш, сай йолташ да пример. Йошкар-Оласе 53-шо номеран «Изи патыр» йочасадыш «Грация» группыш коштшо ньога-шамыч Регина Германовна Хлыбовам (снимкыште) лач тыгай еҥлан шотлат да моткоч аклат.
Регина Хлыбова – Кужэҥер округ Ӱштымбал ялын шочшыжо. И.К.Глушков лӱмеш Оршанкысе шуко профилян колледжын выпускникше. Марий кугыжаныш университетыште тунеммыж годым йочасадыш пашам ышташ пурен. Ача-ава-влак дене пеҥгыде кылым ыштен, пашажым кумшо ий вораҥдара.
– Йочам годым тукым шольо-шӱжар-влакым ончаш полшенам. Уремыште изирак-шамычым модыктен моштенам. Нуно йырем эре погыненыт. Садланак, очыни, «воспитатель лият» манмым кугыеҥ-влак деч чӱчкыдын колынам, – ойла Регина Германовна. – Кызыт воспитательлан кугыжаныш документлам сайын палыман, ньога-шамычым жапын йодмыжым шотыш налын туныктыман. Психологий да педагогике аланыште шке шинчымашым эреак нӧлтыман. Пӱсӧ уш-акылан, волгыдо тӱняумылымашан, чолга ньога-влак кажне кечын кумылем нӧлтат да ойырен налме пашаштем куаным пӧлеклат.
Самырык воспитатель чулым койышан. Воспитанникше-шамычат, тудым ончен, эре ончылно лияш тыршат. Спортышто шуаралтыт, усталык конкурслаште мастарлыкыштым ончыктат. «Ямде лий» газет денат кылым кучат. Мутлан, Полина ден Милена авашт полшымо дене редакцийыш икмыняр гана заметкым колтеныт.
– Марий воспитатель деке логалмылан моткоч йывыртенна. Ӱдырем ден Регина Германовна чӱчкыдын марла кутырат. Тиде йылмым вияҥдаш, тудын дене кугешнаш йӧным ышта, – палдара Полинан аваже Диана Мамаева.
Регина Германовнам да чыла воспитатель-влакым пайрем дене саламлена. Йӧратыме пашада куаным кондыжо!
Оля МАЙКОВА.
Авторын фотожо.
