Волжск оласе 4-ше №-ан школ пеленысе «Счастливый билет» волонтёр отряд изинек эмганен кушшо йоча-влак дене куд ий утла пеҥгыде кылым куча. Отрядым школ директор М.В.Янковская вуйлата.
– Кызыт «Ребёнок с будущим» организаций дене пырля пашам ыштена. Ӱдыр-рвезе-влак дене проект-шамычым ямдылен, илышыш шыҥдарена. Робототехнике, кулинар (снимкыште), ненчаш, ургаш туныктымо, театр, инклюзив мастерской-влак пашам ыштат. Лишыл жапыште аудио-видео студийым почаш палемдыме. Тушто йоча-влак тӱрлӧ видеом войзаш тунемаш тӱҥалыт. Аутизм чер дене орланыше йоча-влаклан вес ийын 4-ше номеран школ пелен классым почаш шонена, – ойла Марина Валерьевна.
Волонтёр отряд кок направлений дене пашам ышта. Икымше – изинек эмганен кушшо йоча-влаклан полшаш, тӱрлӧ пашалан туныкташ. Весе – начар тазалыкан икшыве-влакым моло йоча-шамыч дене ик радамыште улмыштым шижаш кумылаҥдаш.
Волонтёр отрядысе ӱдыр-рвезе-влак «Добро пожаловать в жизнь» проект дене Президент грантым сеҥеныт. Грант окса да ача-ава-влакын полшымышт дене пачерым налыныт. Тушко изинек эмганен кушшо икшыве-влак кечыгутлан толыт да шке шот дене илаш тунемыт. Кочкаш ямдылат, пӧрткӧргым эрыктат, кевытыш коштыт, кидпашам ыштат. Кодшо ийын «Ребята-поварята» проект дене «Доброволец – 2020» всероссийский конкурсышто Настя Иванова сеҥымашке шуын: 400 тӱжем теҥгем пуэныт. Тиде окса дене мебельым, техникым да кӱмыж-совлам уэмденыт.
Йоча – ача-аван куанже. Тудо кеч таза, кеч черле лийже, йӧратымашым, умылымашым, пагалымашым шижын кушшаш. Начар тазалыкан йочалан куаным пӧлеклаш лиеш. Полыш киддам шуялташ ида лӱд.
