«Движение Первых» йоча толкынын школ пеленысе ушемын председательжын тӱҥ сомылжо – ӱдыр-рвезе-влаклан ой-каҥаш дене полшаш, нуным мер пашалан кумылаҥдаш, туныктышо-шамычлан тӱрлӧ мероприятийым эртарымаште эҥертыш лияш. Тудо чулым, йырже икшыве-влакым чумырен моштышо, пӱсӧ уш-акылан. Лач тыгай койыш-шоктыш дене Советский посёлкысо 3-шо номеран школышто 9-ше «А» классыш вончышо Екатерина Сушенцова ойыртемалтеш.
– Закон-влакым шымлем, кугыжаныш органын пашаже кузе кайымым пален налнем. Садлан обществознаний предмет поснак келша. Физкультурымат йӧратем. Тудо капкылым шуараш полша. Яра жапыште пулевой лӱйкалымашыш коштам, мастарлыкым погем. Йоча пагытем пиалан манын кертам. Тудым сайын, шарнымашеш кодшын эртарем, – ойла ӱдыр.
Катя «Лӱдыкшыдымылык школ» республикысе слётышто, «Ворошиловский стрелок» всероссийский фестивальын республикысе йыжыҥыштыже да ятыр вес погынымаште лийын. Ик эн ойыртемалтше семын «Артек» тӱнямбал йоча рӱдерыште эртаралтше «Служить России» сменыш миен коштмыжым шотла.
– «Артекыште» кажне татше пайдалын, веселан эртен. Шуко ум пален налынам. Шке вием, моштымашем тӱрлӧ конкурсышто тергенам. Кугу кӱкшытыш шушо ятыр еҥ дене вашлиймаште лийынам, нуно паша опытышт дене палда реныт. Иктаҥаш ӱдыр-рвезе-влак дене таҥлалтынна. Ынде уло Россий мучко йолташем-шамыч улыт, – палдарыш Катя.
Катян тыланымашыже:
– Ме кажныже уста, икте-весе деч ойыртемалтше улына. Койыш-шоктышда деч ида вожыл. Шкендам йӧратыза.
Оля МАЙКОВА.
Фотом еш архив гыч налме.
