Редакцийышке Эльвира П. (Кужэҥер район) деч йодыш пурен: «Кызыт чӱчкыдын ветеринар паспорт нерген ойлат. Кажне пийын да пырысын тудо лийшаш мо? Тыгай паспортын кӱлешлыкше могай?»
Тиде йодышлан Угарман кундемысе да Марий Эл Республикысе фитосанитар да ветеринар надзор дене федерал службын специалистше К.И.АНТОНОВА (снимкыште) вашмутым пуа:
– Кажне пийлан да пырыслан ветеринар паспорт кӱлеш манын законышто возымо огыл. Паспорт кок тӱрлӧ лиеш: российысе да тӱнямбал образецан. Ныл йолан йолташдан документше уке гын, тудым поездышке, самолётышко огыт шынде. Тукымвож деч посна нуно ончерышке ушнен огыт керт. Пийда але пырысда еҥым пурлеш, а вакцинацийым ыштыме нерген увер уке гын, пурлмо еҥ эмлалтшаш, курсым эртышаш.
Ныл йолан йолташдам вес элыш пеленда наҥгайынеда гын, тӱнямбал паспортым ыштыман. Свидетельствыште озан лӱмжӧ, ийготшо, илыме верже, телефонжо ончыкталтеш. Пийын лӱмжым, шочмо кечыжым, урлыкшым, тӱсшым, тамган (клеймо) номержым да тудым шындыме верым, чипирований нерген уверым да молымат возат.
Ветеринар паспортым кузе ышташ? Мутлан, пийым питомникыште налыда гын, тудын документше ямде лиеш. Уремыште коштшым мӧҥгыда пуртеда гын, ветклиникыш тудлан вакциным ыштыкташ наҥгайымеке, бланкым налын кертыда.
