Пийым кычкен таҥасымым але марте ужаш логалын огыл ыле. Йошкар-Ола воктенысе «Корта» тунемме да тренировкым эртарыме базыште Российын кубокшо верч да ездовой спорт дене всероссийский таҥасымаште лияш пиал шыргыжалын. Хаски урлык пийым вӱден кайыше ӱдыр дене икмыняр шомакым вашталтышна.
– Пий-влакым моткоч йӧратем. Ты спорт деке авам Мария Анатольевна шӱмаҥден. Ханза лӱман пием дене йолташ улына. Тудо пеш ушан да поро. Ятыр командым пала. Ты спортышто шуаралтше пийвлак пеш виян да писе, мутым колыштшо улыт. Тидланже кужу жап тренироватлыман. Таҥасымашке ушнаш нуным кумылаҥден моштыман. Мутлан, тамле кочкыш дене, – ойла ӱдыр.
Мутланымаш гыч пале лие, ваштарешем – Йошкар-Оласе 31-ше номеран школышто 3-шо классыште тунемше Есения Корнилова. Ты кечын тудо кугыеҥын полышыж деч посна икымше гана таҥасен. Нартым (ты спортлан келыштарыме издер) ӱшанлын виктарен да шке ийготан-влак коклаште ший медальым сеҥен налын. Ӱшанле пийым да тудын изи озажым снимкыште ужыда.
Оля МАЙКОВА.
Авторын фотожо.
