«Кинолог» шомакым колмеке, ушышто кино дене кылдалтше шонымаш шочеш. Но тиде йӧршын вес умылымашым ончыкта. Грек йылме гыч кусараш гын, «κυνός» мут «пий» манме лиеш. Кинолог пийым ончен кушта, койышыжым шымла да тудым иктаж-мом ышташ туныкта. Тидын нерген Ксения ФИЛИЧКИНА дене кутырышна.
– Кинолог лияш шонымаш кузе шочын?
– Пийым изи годсек йӧратем. Но ончыкылык илышем юрист паша дене кылдаш шоненам. Варажым тиде сомыл чонемлан лишылла чучын огыл. Кинологийым шымлаш, кинологий спорт дене кылым кучаш тӱҥалынам. Москошко тунемаш коштынам. Ик заводын служебный питомникыштыже 3 ий наре пашам ыштенам. Кызыт «эрыкан кинолог» улам. Еҥ-влакым пийым умылаш, тудын дене кылым ышташ туныктем. Ныл йолан йолташ-влакым ончерлан, моторлык конкурслан ямдылем.
– Дрессироватлыме икымше пийда могай урлык гыч лийын?
– Икымше пием – эрвел Европысо овчарке. Мый тудлан Лайза лӱмым пуэнам. Кызыт бордер колли урлык пийым ашнем.
– Тудо моло деч мо дене ойыртемалтеш?
– Найс пием моткоч ушан, тӱткӧ, кӱштымым шуктышо. Тудын ушыжым, капкылжым эре вияҥ-дыман. Найс кӱтӱчӧ ур-лыклан шотлалтеш гынат, оласе илышлан туныкташ лиеш.
– Могай урлык пийым туныкташ куштылгырак?
– Ик урлыкым посна палемдаш ок лий. Ныл йолан йолташна-влак тӱрлӧ улыт. Пийым налме деч ончыч тудын нерген уверым кычалман, шымлыман. Тендан жапда ситымым шотыш налман. Специалист-влак деч каҥашым йодман.
– Кажне еҥ кинолог лийын кертеш мо?
– Уке. Кинолог нелылыкым чытен кертше, пашаче лийшаш. Пий дене пашам ыштымаш ик кечаш сомыл огыл. Тидлан ӱмыр мучко тунемман. Мутым колыштшо пийым гына огыл, чылаштым иктӧр йӧратыман.
