Мыйын кокам Роза Матвеевна Ишимова (снимкыште коктын улына) Буймо кандашияш школышто 1966-1968-ше ийлаште пионервожатыйлан пашам ыштен. Тудо ты жап дене мыйым палдарен. Пионер радамыш 22 апрельыште (В.И.Ленинын шочмо кечынже) пуртеныт, йошкар галстукым пижыктеныт. Тидын деч вара тудым кажне кечын кылденыт. Товатмутым чыла йоча наизусть пален. Горн да барабан йӱк дене кажне мероприятий годым тистым луктыныт. Буймо школын пионер дружиныже комсомолец-герой Олег Кошевойын лӱмжым нумалын.
Пионер-шамыч шоҥго-влаклан, колхозлан полшеныт, рӱж каненыт. Ачай ден авай тулотым порын шарнат. 19 майыште йоча-влак строй дене лӱмын келыштарыме верыш ошкылыныт. Миен шумеке, кажне отряд рапортым пуэн. Идалык мучко шуктымо пашам иктешленыт. Ойыртемалтше ӱдыр-рвезе-влаклан грамотым кучыктеныт. Эн чулым да чолга икшыве-шамычлан тулотым ылыжташ ӱшаненыт. Тул йӱлымӧ жапыште модыныт, пионер мурылам йоҥ- галтареныт. Авай эсогыл пионер-влакын гимныштым , «Взвейтесь кострами, синие ночи» мурым, муралтен ончыктен.
Кажне кеҥежым йоча-влак палаткан лагерьыште каненыт. Тушто модыныт, йӱштылыныт, эм шудым погеныт, шочмо верыште экскурсий дене коштыныт, тӱрлӧ конкурсым эртареныт, клубышто кином онченыт. Лишыл еҥем-влаклан тул ӱмбалан подеш кочкаш шолтымо поснак келшен.
Каласкалымыштым колыштын, кызытсе «Движение Первых» толкын ден таҥастарышым. Икгайлыкше уло гынат, кызытсе йочан илышыже чотак ойыртемалтше.
Альберт ИШИМОВ.
Татарстан, Агрыз, Буймо.
Фотом еш архив гыч налме.
