Писын лудмаш  сай але уда?

Школышто тӱҥалтыш класслаште йочан ик минутышто мыняр мутым лудмыжым тергат. Такшым изи йочам писын лудаш туныктыман мо? Южо ача-ава, либерике йӧным кучылтын, икшывыжым писын лудаш кумылаҥда. Писын лудмашын пайдаже уло мо?  Нине  йодышлан вашмутым психологий шанче кандидат, доцент Т.Н.ГОЛОВАНОВА  пуа:

– Писын лудмашын кӱлешлыкше кажне ийын кушкеш. Но тудын сай да уда могыржо-влак улыт. Писын лудмаш уверым кӱчык жапыште умылен шукташ да ушым пӱсемдаш полша. Йоча кугу текстым уто нелылык деч посна шарнен кодеш да каласкален кертеш. Икшыве сайын тунемаш тӱҥалеш, шке вийжылан ӱшана да кугу кӱкшытыш шуэш. Мӧҥгысӧ пашам писын да чаткан ышта. Тыге вес пайдале сомыллан яра жапше лектеш. Писын лудшо тунемше, 9-11-ше класслашке шумеке, экзаменым нелылык деч посна куча.

Но икшыве писын лудмыж годым авторын сылне йылме дене возымыжым ок шеклане. Тудо текстын тӱҥ шонымашыжым гына умылаш тырша. Произведенийласе герой-влакын куанымыштым але ойгыштым огеш шиж. Йоча образ-влаклан тӱткышым огеш ойыро. Тыге мут шапашыже огеш ешаралт. Садлан, ача-ава-влак, шоналтыза, кунам йочалан писын, а кунам тыглайын лудман.