Пият спортсмен лиеш

Ныл йолан йолташым, пийым, кычкен таҥасымаш спортын ик эн оҥай видшылан шотлалтеш. Спортсмен пий-шамычым лӱмын ямдылат. Тидын да моло нерген «Йошкин Пёс» ездовой спорт туризм тӧнежын генеральный директоржо А.А.Касьянова дене мутланышна.

– Алёна Андреевна, сибирский хаскым, якут лайкым латик ий утла ончен куштеда. Нуно тыглай урлык деч мо дене ойыртемалтыт?

– Кажне урлык пий мом-гынат ыштен мошта. Тиде пийын кугытшо, вий-куатше дене кылдалтын. Доберман, веймаранер, овчарке-влак кычкен таҥасымаште поснак тале улыт. Пийым жап дене шуарена. Нунын спортсмен-влак семынак каныш кечышт уло.

– Вий-куат дене веле огыда серлаге, уш-акылыштымат пӱсемдеда.

– Ме кажне кечын гаяк у пашалан туныктена, у верыш лектына, еҥ, пий-влак дене палыме лийына. Тыге нуно шке семынышт шонаш тунемыт. Пий дене кужу жап пашам ыштыше тидым вигак ужеш.

– Хаски урлык пий-влак икте-весышт деч пуйто йӧршын огыт ойыртемалт. Туге гынат кажныжын лӱмжӧ уло. Кузе ойыркален шуктеда?

– Чын, южышт тӱсышт дене йӧршын огыт ойыртемалт, манаш лиеш. Изи годсек нунын пелен лият, ончен куштет гын, тӱжвал тӱсыштым веле огыл, чоныштышт мо ышталтмымат умылет. Кажныжын – шке койышыжо. Нунын паспортышт уло. Мый документысе да мӧҥгысӧ лӱмыштымат палем. Мутлан, ме ик пийым Марс манына. Паспорт почеш – Rave Review Number One. Игыже – Кип (Rave Review Keep Walking).

– Тыгай пий-влак поро улмышт дене ойыртемалтыт. Нуно шочынак тыгай улыт?

– Икмыняр курым ожнак йӱдвелне илыше-влак пийым айдемым йӧраташ туныктеныт. Нунылан эсогыл изи икшывыштым ӱшаненыт. Пий кажне еҥым эн сай йолташыже семын ужшо манын, кумылаҥдаш тыршеныт. Туге гынат пийын койышыжо ончен куштымо деч шога.