Мотор пеледыш аршашым кучен, эн сылне школ формым чиен, ваче гоч у рюкзакым сакен, икымше сентябрь кечын йоча-влак школ кудывечыш ошкылыт. Нуно икте-весым, тунык тышым ужаш вашкат. У тунемме ийлан йывыртеныт. Шинчымаш кечын тӱҥ озаже, икым ше классыш тунемаш кайыше-влакын, чонышт поснак вургыжеш. Ынде нуно ньога огыл – тунемше улыт. Шинчымаш тӱняш икымше ошкылым ыштат.
Теве «Марий Эл» увер агентствын дизайнерже Татьяна Вениаминовна ден «Ончыко» журналын тӱҥ редакторжо Игорь Геннадьевич Поповмыт Даша ӱдырыштым икымше классыш ужатат.
– Ӱдырна Йошкар-Оласе 1-ше номеран школышто 1-ше «А» классыште шинчымашым погаш тӱҥалеш. Классыштышт 27 йоча: 17 рвезе да 10 ӱдыр. Икте-весе дене келшен, ваш эҥертен кушкышт. Школ илышышт пиалан, пайдале, у сеҥымашлан поян лийже, – ойлат самырык ача-ава.
Даша – «Ямде лий» газетын поро йолташыже. Тудын изирак заметкылажым, сӱретше-шамычым лудшо-влак шукертак эскереныт. Ончыкыжым газетын юнкоржо лиеш манын ӱшанена. Ача- авам чӱчкыдын «визытан» отметке дене куандараш, тунеммаште кугу кӱк шытыш шуаш тыланена.
Оля МАЙКОВА.
Авторын фотожо.
