Марий Эл Республикысе культурын сулло пашаеҥже, калык писатель, Россий Федерацийын сулло журналистше Ипполит Лобанов киноактёр Йыван Кырлан «Мыйым ыштыш марий вате, «Иле, – мане, – шер теммеш!» почеламут корныжым каласышат, ешарыш: «А поэт корным мыланем «Ямде лий» газет почо – икымше почеламутем тушан савыкталтын».
Чынак, тудым Россий писатель ушемышкат йоча-влаклан возышо поэт семын пуртеныт. Изи ньога-влаклан, тунемше-шамычлан Ипполит Иванович Марий книга издательстве гоч «Угӹц шӹжӹ», чевер чия дене сӧрастарыме оҥай сӱрет-влакан «Юр паштек», «Цевер кечӹ», «Йӹрӹзӹ тетя» почеламут сборниклам пӧлеклен.
Икана Кожваж ялыште писатель деке Суворов фамилиян рвезе толын да каласен: «Мый тыйым палем, Немсола гыч улат». «А кузе палет?» – поэт йодын. Йоча вашештен: «Книгат-влакым библиотекыштына лудынам, чевер улыт, оҥай почеламутет-шамыч кумылем нӧлтальыч». Вес гана Йошкар-Олаште эрвел марий «Мый Курыкмарий гыч Ипполит Лобановым палем. «Ончыко» журналыште печатлыме ойлымашыже-влак чонем савырат» манын. Ипполит Иванович каласен: «Тевыс, мый Ипполит Лобанов улам». Коктын воштыл колтеныт.
Нине факт-влак пеҥгыдемдат: поэт, писатель, журналист Ипполит Лобановым Марий Элыште йочажат, кугыеҥжат пагалат.
Ипполит Лобанов – 14 книган авторжо. «Туан пӧрт» книгасе семын йоча-влаклан «Туан пӧртдам, ача-авадам, школдам йӧратыза, марла ойлыза, марий лӱмдам пагалыза, кӱшнӧ кучыза» манеш. Тудо тыге иктешла: «Туан пӧрт вийым пуа, «Ямде лий» йочам ушаҥдара, лудса, почеламутым возыза».
Ипполит Иванович 2026 ий 2 январьыште 75 ияш лӱмгечыжым палемдаш тӱҥалеш. Пайремже дене саламлен, Курыкмарий район Немсола ялын эргыжын почеламутшо-влакым лудаш темлена. Олыкмарлаш поэт-влак Александр Селин да Геннадий Матюковский кусареныт.
Йоча
Окна вошт кечыйол пура модын.
Шыргыжеш, тудым ужын, йоча.
Мом ойла, ок вашеште, кеч йод тый.
Шке шепкаштыже ямлын кеча.
Аза йӱк лыжгаҥда йӱкшыш(ӧ) пӧртым,
Волгалта ачамат, авамат.
Кызыт але капшат моткоч нӧргӧ,
Шарныкта тӱсшӧ ден кӧм-гынат.
Налыт кидыш – колта шыргыжалын…
Йочам пеш марий калык жапла.
Тудын йӱкым колеш, налеш алым,
Чонжо дене куана йочала.
Лӱҥгалтыш
У лӱҥгалтышым ачам
Йӧнештарыш. Мый – йоча.
Куанен моткоч чонем.
Мый шогенак чоҥештем.
Лач мардежше вышт да вушт,
Кутыра йышт: «Патыр куш!»
Шыргыжал манеш ачам:
«Лиятак дыр космонавт?»
Ойжо кумылым нӧлта –
Мый кавашке лӱҥгалтам.
А кунам кушкын шуам –
Мӱндыр шӱдырыш шуам.
Снимкыште: Ипполит Лобанов – Степан уныкаж дене шочмо суртшо ончылно.
Фотом еш архив гыч налме.
