Софья Белорусова Оршанке район Лужбеляк школын 5-ше классыштыже тунемеш. Тудо кажне еҥлан полыш кидым шуялташ ямде. Шкенжым волонтёрлан шотла.
– Тиде пашалан Катя акамым ончен кумылаҥынам. Тудын гаяк чолга лийнем. Палем, волонтёрын пашаже шуко. Тудо нимо деч лӱдшаш огыл. Мый илалше-влаклан полшем, кайык-влакым пукшем, йолташем-шамыч дене пырля чапкӱ воктене, уремыште арулыкым эскерена. Тунемше-влакын российысе толкыныштын школысо ушемышкыже кодшо ийын ушненам. Тӱрлӧ конкурсышто вием тергем. Проект-влакым возаш тунемам. Икымше пашам «Добровольчество да волонтёрство – мыйын ешыштем» лийын, – ойла Софья.
