Юра кумшо классыште тунемеш. Урокышто туныктышын умылтарымыжым шот дене умылен ок шукто, садланак «кумытан» деч кугурак отметкым налмашыже уке. Теҥгече кастенат Юра математике дене пуымо задачым мӧҥгыштыжӧрешатлен кертын огыл, садлан таче школыш эн первый толын. Амалже раш: кӧ деч гынат возен налаш шона.
Теве классыш ударнице Оля толын пурыш. Юра вигак тудын деке миен шогале:
– Оля, математике дене задачым ыштенат?
– Ыштенам, – ӱдыр чолган вашешта.
– Мыланем возен налаш пу! – шоколад кампеткым кочкын шогышыжла, Юра йодеш.
– А тый олмешыже мом пуэт? – Оля Юран шере сийжым чоян ончалеш.
– А мо кӱлеш?
– Шоколад кампеткетым пу!
Юра тунамак кӱсенже гыч вес шоколад кампеткым луктын пуа. А Оля тудлан шке тетрадьшым шуялта. Юра тунамак, лап возын, задачын решенийжым возен налеш.
Теве математике урок тӱҥале. Туныктышо йодеш:
– Мӧҥгылан пуымо задачым решатлен ончыкташ кӧдоска деке лектеш?
Юра математике дене кеч ик «визытаным» налаш шонен, тунамак кидшым кӱшкӧнӧлталеш.
– Ну, Юра, тый таче мыйым ӧрыктарет, – туныктышо Юрам шымлышыла ончалеш. – Лек тугеже доска деке.
Юра, шке тетрадьшым кидышкыже кучен, доска воктеке лектеш да возаш тӱҥалеш. Серен пытарымеке, саҥгаж гыч пӱжвӱдым ӱштылын, туныктышым чолган ончалеш. Тудо доскаште мом возымым ончал лектешат, Юрам мокталтыме олмеш шылтален пелешта:
– Тыгай проста задачымат решатлен от мошто! Шич! «Кокытан»!
Юра ӧрын шогалеш. Нимом умылен ок керт: кузе туге «кокытан»?
Урок деч вара Юра Олям коридорышто авыра:
– Тыгай проста задачымат решатлен от мошто улмаш! Тыланет кӧра «кокытаным» нальым! Кампеткемым мӧҥгеш пу, двоечнице!
Александр ПЕТРОВ, Марий Элын калык писательже.
Сӱретым freepik.com сайт гыч налме.
