Российыште шала коштшо пий ден пырысын чотышт шагалемеш гынат, 2025 ийлан приютлаште 170 тӱжем наре ныл йолан йолташ уло. Нунылан утларакше йоча-шамыч полшат. Теве У Торъял кыдалаш школын тунемшыже-влак (снимкыште) «Доброе сердце» акцийым 2023 ий гыч эртарат. Директорын воспитаний паша шотышто алмаштышыже Ю.Л.Домрачева тӱҥалтышым ыштен.
– Ушнышо-влак ий гыч ийыш ешаралтыт. Ме Шернур посёлкышто верланыше приютыш уналыкеш коштына. Тӱрлӧ кочкышым да арверым пеленна наҥгаена. Тыгак икшыве-шамыч сӱретым сӱретлат. Пашашт-влак приютысо пырдыжым сӧрастарат. А 3-шо «Г» классыште тунемше Софья Чемоданова шке кидше дене пырыс-шамычлан модышым урген да приютлан пӧлеклен, – ойла Юлия Леонидовна.
Приютышто йоча-влаклан пий ден пырысым ниялткалаш, модаш пуат. Тыгодым кажныжын чонжо шортеш: иктажшым мӧҥгӧ наҥгаяш кумыл шочеш. Но ӱдыр-рвезе-шамыч палат: изи йолташым пелен налмеке, тудым ончыман. Сандене эн ончыч ача-ава дене мутланат. Туге гынат ынде кок пырыс У Торъял районышто йӧратыме озажым муын.
– Российысе пырыс кече вашеш приютыш мийымеке, 4-ше «А» классыште тунемше Екатерина Свинцова йӧратыме Дусяжым вашлийын. Пырыс ӱдырым шке ойырен: эре почешыже коштын, кидышкыже кӱзаш ваҥен. Аваж дене мутланымеке, пырыс у пӧртым муын. Тыгак 4-ше «В» классын тунемшыже Аделина Танерова Ася пырысым мӧҥгыжӧ конден, – палдара Юлия Домрачева.
Тунемше-влакын поро пашашт чоныштым пойдара. Воктен улшо йолташыштым поро кумылым ончыктымо сомылым ышташ тарата.
Катя СЕРГЕЕВА.
Фотом школ архив гыч налме.
