Марий Эл Республикысе йоча да подростко-влакын «Эр вий» ушемышт «Семейное добровольчество – территория возможностей» проект радамыште «Семейный марафон добрых дел» акцийым эртарен. Тушко Марий Турек, Медведево, Морко, У Торъял, Оршанке, Советский районла, Йошкар-Ола да Звенигово ола гыч 107 еш ушнен. Кажне еш командын маршрут лаштыкше лийын. 99 тӱрлӧ поро паша гыч шкалан келшышым ойырен, сомылым шуктеныт. Южо полышым дистанционно пу-аш лийын. Команде-влак кажне пашалан баллым погеныт.
Йошкар-Ола гыч Антоновмыт-Речкинмыт еш 31 поро пашам шуктен да 700 балл дене чылам ончылтен. 14 еш призёр радамыш лектын. Нуно 300 баллым погеныт.
– Ме волонтёр еш улына. Тидын дене кугешнем. Мый шуко жапым ача-авам дене пырля эртаренам. Ятыр вере лектын коштмо. Еҥ, ныл йолан йолташна-ша-мычлан полшымо, врач-влаклан тауштымо, кумдан палыме еҥ-влак, тоштер, чапкӱ нерген видеороликлам войзымо, йоча-шамычлан модашышт келыштарыме верлам ачалыме да шуко моло пашам шуктымо. Полыш кидым кеч-кӧлан да кеч-кунам шуялташ ямде улмына дене кугешнем да волонтёр радамыш шукырак еҥым ушнаш ӱжам, – ойла Ян Речкин.
Поро паша мондалтдыме. Тудым ышташ нигунам вараш от код. Куаным, пиалым кажне кечын кондыман. Порылыкын юзо вийже тек тӱняште курымеш ила.
