Шукерте огыл школлаште икымше йыгыр у тунемме ийлан тӱҥалтышым пуыш. Шинчымаш кече пайрем палым школ коридор ден класслаште кызытат шекланаш лиеш: ик вере шар лойгалт
кеча, вес вере сылне пеледыш аршаш классым сӧрастара. Икымше тунемме арня ик эн оҥай, шонем. Тунемше-влак кужу каныш деч вара икте-весе дене шер теммеш мутланат, пайдале жапышт нерген каласкалат. Кум тылзе жапыште кажныже кушто гына лийын да мом гына ужын огыл! Лач тыгай сӱретым ме Кужэҥер районысо Коҥганур кыдалаш школышто шекланышна. 3 сентябрьыште ты школышто тунемше-влак дене вашлиймашым эртарышна.
Эртыме корно
Коҥганур школын Кугу Тумньымучаш ялыште верланымыже тек тендам огеш ӧрыктаре.Лач 130 ий ончыч Коҥганурышто икымше пу школ почылтын. 1987 ийыште Кугу Тумньымучаште у полатым чоҥеныт. Кугу, кум пачашан школ тений 63 тунемшым вашлийын. Актовый ден спорт
зал-влак, тоштер, школ пеленысе пакча, тӱрлӧ кабинет – чылажат йочалан келге шинчымашым налаш да вияҥын кушкаш ышталтын. Тидыже тунемше-влакын сеҥымашышт гыч сайын палдырна. Тӱрлӧ шанче конференций, олимпиаде, конкурс ден таҥасымашлаште ӱдыр-рвезе-шамыч ик эн ончылно улыт. А мыняр лӱмлӧ да пагалыме еҥ ты школым кокымшо пӧртшылан шотла!
Чолга лият – пӧлекым налат
Йоча-влак дене вашлиймашна кок йыжыҥан лие. Эн ончыч тӱҥалтыш класслаште тунемше-шамыч дене мутланышна. Эчук ден Пампалче дене пырля ӱдыр-рвезе-влак газетым шергал лектыч, тӱрлӧ йодышлан вашмутым пуышт. Модышлаште чулымлыкым ончыктен, пӧлекым
сеҥен нальыч. Шочмо йылмым палымыштымат тергышна. Йоча-шамыч мастарлыкышт дене куандарышт. Теве 4-ше классыште тунемше Ангелина Королёва «Баллада о матери» почеламутым моткоч сылнын лудо. Тудым туныктышыжо Надежда Ивановна Горинова ямдылен.
5-8-ше класслаште тунемше-шамыч дене мутланымаш келгырак да поянракла чучо. Ӱдыр-рвезе-влак дене газетыш мо нерген да кузе возаш лиймым радамлышна. Модышлаштат ӧрмалген ышт шинче. Анна Соколова ден Виктория Киселёва поснак ойыртемалтыч. Тунемше-шамычын икте-весе дене келшен илымышт раш палдырныш.
Ковышта – пакчалан оза
Йоча-влак дене вашлийын мутланымеке, тоштерым, школ пеленысе пакчам ончал савырнышна. Тоштерым марий йылмым туныктышо Галина Степановна Тобекова вуйлата. Эртыме корным шарныктарыше вер поян. Тушто урокым эртарат, шинчымашым пойдарат.
Школ пеленысе пакча витле сотык наре кумдыкым айла. Тудым трудым туныктышо С.А.Трифонова вуйлата. Пакчаште тӱрлӧ пакчасаскам, емыж-саскам ончен куштат, опытым эртарат. Тений ковыштан, йошкарушменын лектышышт поснак куандарыше.
– Тунемше-шамыч шошым тӱҥалын шыже марте школ пакчаште тыршат. Нуно умылат, мом ончен куштена, чылажымат школ кочмыверыште кучылтына. Мутлан, тений витле литр наре шоптыр вареньым ямдыленна. Помидор дене опытым эртаренна. Йӱран игечылан кӧра опытын лектышыжым ужын ышна керт. Туге гынат, пакчаште тыршен, йоча-шамыч шинчымашыштым пойдарат. Росотам ончен куштымо, могай кушкылым мо почеш шындыме да моло нергенат пален налыт, – ойла Светлана Афанасьевна.
Ӱшанена: ты школын тунемшыже-влак, ончыкыжымат эртыме корныштым шарнен, сеҥымашышт дене куандараш тӱҥалыт. «Ямде лий» газетын поро йолташыже лийыт.
Катя СЕРГЕЕВА,
Людмила ГРИГОРЬЕВА.
Автор-влакын фотошт.
