Порылык – тукым гыч тукымыш

Йошкар-Олаште илыше Жировмыт еш шкеныштым тӱрлӧ вере тергат. Усталык шӱлышан, чолга ешын ик шӧрынжӧ – волонтёр паша. Девизышт – «Порылык тукым гыч тукымыш куснышаш». Ава Мария Вячеславовна икшывыже-влакым волонтёр пашалан изинек шӱмаҥден. Тукымвожым шымлат, изинек эмганен кушшо йоча ден кугыеҥ-влаклан, уста самырык еҥ-шамычлан полшат, экологий акцийлам эртарат, оза деч посна кодшо ныл йолан йолташ-влаклан полыш кидым шуялтат.

Тукымвожым 1997 ийыште шымлаш тӱҥалме. Тачысе кечылан шым кугезе тукым нерген палена. Фото ден серыш-влакым онченна, газет гыч пӱчкеден лукмо лаштыклам шергалынна, шоҥгыеҥ-влак дене мутланенна. Шукыштлан персональный картычкым ыштенна. Мемнан родо-тукымна волонтёр паша дене чак кылдалтше лийын, – ойла Мария Вячеславовна. – Нунын сомылыштым кызыт ме шуена. Волонтёр паша – мемнан илыш, чоным куандарыше сомыл. Шкенан йыр тунемше, самырык-влакым чумырена. Кызыт командыште 270 утла волонтёр уло.

М.В.Жирован Маргарита ӱдыржӧ Йошкар-Оласе Бауман лицейын 10-шо классшым тунем пытарен. «Дорога в творчество» проектше дене «Доброволец России» всероссийский конкурсышто сеҥышыш лектын. Изинек эмганен кушшо йоча-влаклан турист корным «Рука об руку» проектше почеш ямдыленыт.

Ме шуко вере лектын коштына. Изинек эмганен кушшо, ача-ава деч посна кодшо йоча-влаклан мероприятийлам эртарена, пидаш, тӱрлаш туныктена, изирак концертым ончыктена. Ме кажне ӱдыр-рвезе дене вашкылым ышташ тыршена, сандене изиш психологат лияш перна. Йоча-шамыч кеч ик жаплан ойгыштым мондышт манын, эре шонена, – ойла Маргарита.

Катя ты лицейын 6-шо классышкыже вончен. Ава ден акаже семынак «порылык» корным тошка.

Волонтёр лияш мыланем келша. Ты радамыш шогалмемлан вич ий эртыш. Команде дене пырля шуко пашам шуктена. Кугу Ачамланде сарыште лийше ветеран, тылыште тыршыше-влак деке коштына: 100 наре еҥ деке миенна, – ойла Катя.

Жировмыт еш порылык дене ила. Чон йодмо пашам шукта. «Волонтёр радамыш шогалаш шонышо-влаклан мом темледа?» – манын йодмемлан самырык ава тыге вашештыш:

Те эн ончыч шоналтыза: поро кумылым ончыктышо полышым кеч-кӧлан да кеч-кунам пуэн кертыда мо? Шукыштлан тиде паша келша, да нигунамат огыт чарне. Тек тӱняште порылык озалана.