Кажне ешыште Ачамландым аралыше герой-влак улыт, шонем. Авамын тукымжо гыч Ананий Матвеевич Алексеев нерген палдарыме шуэш. Тудо Агрыз районысо Кӱанэҥер ялеш 1948 ий 4 ноябрьыште шочын. Буймо школым тунем пытарымек, Мензелинскысе медицине училищыш пурен. Шинчымашым налмек, Узаевский медпунктышто пашам ышташ тӱҥалын. Шым тылзе гыч тудлан повестке толын, да Златоуст олаште срочный службым эртен. Варажым 1971-1973 ийлаште Варзин ФАП-ым вуйлатен, прапорщик званийым налын. 1985 1987 ийлаште Афганистаныш служитлаш колтеныт. Службыжо Джелалабад олаште эртен, 66-шо мотострелковой бригадын аптекыжым вуйлатен. Афганистан деч вара Озаҥысе кӱшыл артиллерий училищыште, Чистяков лӱмеш инженер училищыште служитлен. 1994 ийыште сулен налме канышыш лектын да 2011 ий марте вашкеполыш станцийыште фельдшерлан пашам ыштен. Ятыр медаль, Таумут, Чап грамот-влак дене суапландаралтын. 2017 ийыште ӱмыр лугыч лийын. Тудо Шочмо эл ончылно порысшым тӱрыснек шуктен. Мый тудын дене кугешнем!
Наташа ИШМАНОВА.
Татарстан, Агрыз, Буймо.
