10 декабрьыште Марий тиште кечым палемдена. Ты пайрем вашеш ушышто тӱрлӧ шонымаш пӧрдеш. Марий йылме могай поян, сылне. Но молан марий ача-аван икшывыже рушла кутыра? Тыште еш титакан, очыни. Йоча шочмеке, ача-ава вигак рушла пелештат гын, ньога ончыкыжым кузе марла мутлана? Тиде ик эн кугу йоҥылыш. Шуко йылмым палет – уш-акылет сайынрак пашам ышта, школышто вес предметым тунемаш куштылго. Кугу лийына, кеч-кушто илена гынат, шочмо йылме дене кутыраш вожылман огыл. Йоча-влак, йӧратыза, аралыза шочмо йылмыдам. Ме огыл гын, кӧ тудын пӱрымашыже верч тургыжлана?!
Юлия ЯГОДАРОВА.
Советский, Кельмаксола.
