Провой кундемым моктат

Марий Элысе кажне район шке семынже мотор да поян. Тудын сылнылыкшым ужын моштыман. Эскерыман веле огыл, калыкымат палдарыман. Кызыт тидлан шуко йӧн уло. Теве Звенигово лицейын 8-ше «А» классыштыже тунемше-влак Виктория Столярова, Дарья Одинцова, Полина Смирнова туныктышышт А.С.Новосёлова дене пырля «ВКонтакте» соцкылыште «ЭтноБлог Звенигово» тӱшкам почыныт. «Идалыкын этноблогерже» всероссийский мер премийын «Самырык этноблогер» таҥасыштыже сеҥышыш лектыныт.

Звенигово оласе йоча усталык пӧртыштӧ «Школа юного этноблогера» кружокын пашам ышташ тӱҥалмыж нерген пален налмеке, тушко шуко шоныде ушненна. Тиде аланыште ынде ик ий тыршена, – ойлат ӱдыр-влак.

Самырык этноблогер-шамыч шочмо кундемын моторлыкшым шымлаш тӱрлӧ вере лектын коштыт. Шернур район Кукнур селашке Йӱштӧ кугыза дек унала миеныт. «Марий Чодра» национальный парк кумдыкысо пӱртӱсын сӧраллыкшым онченыт, историйже дене палыме лийыныт.

– Марий пӱртӱс эн мотор да эн поян. Тыште чыла уло: гӱжлышӧ чодыра,  яндар эҥер, ер, янлык, кайыквусо, ойыртемалтше кушкыл-влак. Ме Провой кундемыште шочынна, садлан тудлан кугу тӱткышым ойырена. Звенигово оласе кажне пӧртын, шарныктышын, эсогыл теҥгылын историйышт мыланна оҥай. Кундемнан чапланыше еҥже-влакын илыш корныштым шымлена. Тыгак, йӧратыме да пайдале книга дене палдарен, самырык-шамычым лудаш кумылаҥдена. Уста еҥ-влак дене вашлийын, интервьюм войзена. Марий кундемна дене моткоч кугешнена, – ойлат этноблогер-шамыч.