Пилонный спорт 2000-ше ийлаште вийым налын. Российыште 2017 ий гыч палыме. Мо тыгай пилонный спорт? Тиде да моло йодыш-влак нерген Марий Эл Республикысе пилонный спорт федерацийын вуйлатышыже, тренер Е.С.Новосёлова дене мутланышна:
– Пилонный спорт акробатикым, гимнастикым, хореографийым иктыш уша. 2018 ий гыч тиде спортым ончыч Москошто, вара Йошкар-Олаште вияҥдаш тӱҥалынам. Кодшо ийын пилонный спортым Российыште спортын посна видше семын пеҥгыдемденыт. Шукерте огыл Марий Элысе самырык-влак политике, спорт да туризм министерствыште аккредитоватлыме. Чыла тиде ты спортым утларак вияҥдаш полша, таҥасымашлаш ушнаш, у кӱкшытыш шуаш йӧным ышта.
– Спортын тиде видше дене мыняр ияш еҥ-влак кылым кучен кертыт?
– Спорт дене кылым кучаш кумыл уло гын, ийгот чарак лийшаш огыл. Занятийыш вич ияш гыч налына. Нылле ийым эртыше-влакат улыт. Группо-влакым ийготым шотыш налын шеледыме. Занятийым арняште кок гана ик шагат дене эртарена. Разминке гыч тӱҥалына да эркын-эркын нелырак упражненийыш куснена. Тидым ышташ кӱварыш пижыктыме йыргешке пуч полша.
– Евгения Сергеевна, пилонный спортын пайдаже могай?
– Ме комплексный упражнений-влакым ыштена. Тудо организмысе чыла чогашылым пеҥгыдемдаш полша. Йоча-влак тупрӱдым тура кучаш тунемыт, вестибюль аппаратышт, койыш-шоктышышт пеҥгыдемыт, капкылышт лывырга, кид вийышт ешаралтеш. Кызыт республикысе таҥасымашлан ямдылалтына. Тудо 11 июньышто эртаралтеш.
