Российыште тӱрлӧ калык келшен ила. Нунын коклаште пеҥгыде вашкылым арален кодымо да вияҥдыме сомыл – самырык-шамычын кидыштышт. Лач ты шонымаш дене 9-12 сентябрьыште Йошкар-Олаште финн-угор калык-влакын III всероссийский форумышт эртаралтын. Тушко элнан 32 регионжо гыч 200 утла участник ушнен.
Пайремым Э.Сапаев лӱмеш Марий кугыжаныш опер да балет академический театрыште почыныт. Чапле концертым ончыктеныт, самырык-влакын проект конкурсыштым иктешленыт. Сеҥыше-шамыч радамыште марий ӱдыр-рвезе-влакынат пашашт лийын.
Форумышто финн-угор калык-влакым тургыжландарыше йодыш-шамычым нӧлталыныт. Нуным секцийлаште кумданрак каҥашеныт. СМИ пашаеҥ-влак (снимкыште) «Кызытсе увер кыл кумдык» секцийыште паша опытышт дене палдареныт. Вес кундемыште могай газет-шамыч савыкталтыт, йочалан пӧлеклалтше изданий мо дене чаплана? Йоча газет редакцийыште пашам ыштыше еҥлан ты йодыш-шамычлан вашмутым муаш поснак оҥай лийын. Газетым ямдылыме сомыл кызытсе саманын йодмыж почеш вияҥеш. Изирак-шамычым шочмо йылме, тӱвыра деке шӱмаҥдаш тӱрлӧ йӧн кучылталтеш. Мутлан, увер-влакым жапыште шараш манын, интернет дене пайдаланат, видео, йӱк контентым ямдылат.
Форумын участникше-шамыч Келшымаш аллейым почыныт. Рӱдоласе Калыкле тӱвыра пӧрт ончылно 23 пушеҥгым шынденыт. Погынымаш «Мисс студенчества Финно-угрии – 2025» моторлык конкурс дене мучашлалтын. Сеҥыше – Удмурт Республик гыч Софья Снигирева.
12-13 сентябрьыште Марий кундемыште эше ик кугу мероприятий эртаралтын: Российысе финн-угор калык-влакын ассоциацийыштын VIII съездше. Тушко 41 регион гыч делегат-шамыч ушненыт. Погынышто «Традиционные духовно-нравственные ценности финно-угорских народов в укреплении российской нации» темым радамленыт.
Оля МАЙКОВА.
Авторын фотожо.
