Суртышко тӱрлӧ янлыкым ашнаш налме деч ончыч нунын келшен илен кертмышт нерген шоналташ уто огыл. Теве Килемар посёлкышто илыше Николай Васенев ты шотышто ончылгочак ямдылалтын.
– Мемнан суртышто Буся пырыс кум ий наре ила. Ик кечын Александра акам комаголям ашнаш налме нерген мутланымашым нӧлталын. Ачаавана кумылжым шуктеныт, но ты кече гыч ме Буся ден Джунян илыме радамыштым тӱткын эскеренна, – ойла Николай.
Пырыс ден комаголя йолташ лийын кертыт мо? Ты йодышым рашемдаш манын, Николай аваж дене пырля уверым чумыраш тӱҥалын.
– Нине кок янлык тӱрлӧ койышан улыт. Мемнан пырысна ласка, мырлаш йӧратыше. Модыш дене модаш кумылан, кужу жап, окнаш ончен, кайыкым эскерен кертеш. Пӧртыштӧ у арверым вигак шеклана, чыла терген налеш. Джуня – джунгарский комаголя. Ты янлык изи гынат, коклан лӱддымӧ лийын кертеш. Джуня шып койышан. Шукыж годым четлыкыштыже шинча. Лач кастене акам, кидышкыже налын, пӧрт мучко нумал коштеш але лабиринтыш луктын колта, – палдара рвезе.
Николай когыньыштым пырля кодаш тоштын огыл. Кок тылзе жапыште Джуня ден Бусян икте-весе дене вашкылым чоҥымыштым шекланен. Тӱҥалтыште пырыс чӱчкыдын комаголян четлыкше воктене лияш тыршен. Джуням эскерен, чапажым четлыкыш чыкаш толашен, кӱчшымат луктын. Комаголят пырыс деч шекланен, эре тудым ончен, ӱпшынчын.
– Ик тылзе жапыште кок ӱдырна икте-весыштым сайын пален налыныт, лыпланеныт. Буся тыгак клетке воктене кияш йӧрата, но чапаж дене модмым чарнен. Туге гынат когыньыштым иквереш огына кодо, эскерена, – иктешла Николай.
Озаже шкенжым сай могырым ончыкта, кеч-могай ныл йолан йолташ верч мутым куча гын, тӱрлӧ койыш-шоктышан янлык-влак суртышто келшен илен кертыт.
Ой-каҥаш:
- Комаголян четлыкшым пырыс тарватен кертдыме вереш шындыман.
- Четлыкын омсаже пеҥ- гыдын петырналтшаш. Пырыс почын ынже керт.
- Кок янлыклан иквереш кочкаш пуыман огыл.
- Кажне ныл йолан йолташлан жапым ойырыман.
- Пӱртӱс дене ӱчашыман огыл. Пырыс сонарзе койышым ончыкта гын, вурсаш ок кӱл. Комаголям чотрак аралыман.
Катя СЕРГЕЕВА.
Фото-влакым еш архив гыч налме.
