Российыште коронавирус шарлымылан кӧра тений выпускник-влак пытартыш йыҥгырым онлайн йӧн дене эртареныт. «Пытартыш йыҥгыр – 2020» всероссийский акций тунемше да туныктышо-влакым иктыш ушен. Тудо выпускник-шамычлан могай шарнымашым коден?
Алёна ТОКТАРОВА (Шернур, Мустай): «Кызытсе жапыште онлайн йӧн эн сай. Но пайрем кечын чон шижмашым, тургыжланыме татым тӱрысынек тӱжвак лукташ ыш лий. Пытартыш йыҥгыр – тиде школ дене чеверласыме кече. Тудо кажнылан пайрем семын шарнымашеш кодшаш. Мыланна, чаманен каласем, йолташ-шамыч дене вашлийын оҥгыр йўкым колаш ыш логал. Коронавирус эрта да ме чыланат пырля чумыргена манын ӱшанена».
Аня КНЯЗЕВА (Параньга): «Ты всероссийский акцийыш мый ушненам. Шонен лукшо-влаклан таум ойлем. Туныктышо-шамычын поро шомакышт, тыланымашышт кажне выпускникын чонышкыжо логалын, шонем. Онлайн йӧн дене пайдаланен, ме вашла саламленна – тиде чыла сай. Но куан, кудым моло ийласе выпускник-шамыч шижыныт, мемнам ыш авалте. Латик ий пырля тунемме йолташ-влак дене тиде кечым пырля эртараш ыш лий, пытартыш йыҥгыр ыш йоҥго, пытартыш вальсыште ышна пӧрд, ачана-авана мемнам ончен, шинчавӱд йӧре ышт куане – тидлан кӧра ты кечын кумылем волыш».
